Испанийн шигшээ баг ахлах дасгалжуулагчгүй ДАШТ-ийг эхлүүлнэ


6 жил

   Хөлбөмбөгийн Дэлхийн аварга шалгаруулах тэмцээнд түрүүлэх багуудын тоонд зүй ёсоор нэрлэгдэж байгаа Испанийн шигшээ баг тэмцээн эхлэхээс нэг хоногийн өмнө ерөнхий дасгалжуулагчгүй боллоо. Дасгалжуулагч Хулен Лопетегиг ажлаас нь халснаа Испанийн хөлбөмбөгийн холбооны ерөнхийлөгч Луис Рубиалес өчигдөр албан ёсоор мэдэгдэв.

Ийм эрс шийдвэр гаргахад хүргэсэн шалтгаан нь Лопетеги Мадридын “Реал” багтай гэрээ байгуулсан явдал юм. Уг нь тэрбээр хөлбөмбөгийн холбоондоо үргэлжүүлэн ажиллахаар тохиролцож гэрээгээ 2020 он хүртэл сунгаад байсан юм. Гэвч “Реал”-ын амалсан мөнгөнд тэсч чадалгүй ДАШТ-ий дараагаар Мадридыг зорихоор болсон шийдвэрийг нь Рубиалес уучилсангүй.

Рубиалес шийдвэрээ мэдэгдэх үеэрээ “Хөлбөмбөгийн холбоонд дүрэм журам гэж бий. Холбоонд ажиллаж буй хүн бүр түүнийг хатуу мөрдөх ёстой гэдгийг эндээс ойлгож авах хэрэгтэй” хэмээн ярилаа.

Том тэмцээний яг өмнө ийм эрсдэлтэй шийдвэр гаргаснаар шүүмжлэлд булуулахаа мэдэж байгаа гэдгээ ноён ерөнхийлөгч мэдэгдээд “Мэдээж ялалт чухал. Гэхдээ үүнээс чухал нь дасгалжуулагчийн ажиллах арга барил. Би үүнийг бусдаас дээр тавьсан нь энэ” хэмээв. Лопетегийн ажлыг авах магадлалтай хүнээр Луис Энрике хүчтэй яригдаж эхэллээ.

Анхааруулга: Уншигчдын бичсэн сэтгэгдэлд Bestnews.mn хариуцлага хүлээхгүй болно. Зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах хэрэгтэй.
Та мэдээнд саналаа өгсөн байна
1000 Сэтгэгдэлээ бичнэ үү