Монгол Улсын Ерөнхийлөгчийн зарлигаар төрийн дээд Монгол Улсын гавьяат дасгалжуулагч хэмээх хүндтэй шагнал хүртсэн Ц.Шийрэв, Ж.Баярсайхан нарт өнөөдөр ЗГХА, Биеийн тамир, спортын газрын дарга, гавьяат тамирчин Ц.Шаравжамц, Үндэсний шигшээ багийн ерөнхий дасгалжуулагч, Ардын багш, Хөдөлмөрийн баатар, гавьяат дасгалжуулагч Ч.Насантогтох нар хүндэтгэл үзүүллээ. Ц.Шийрэв дасгалжуулагч жүдо бөхийн спортод олимп, дэлхийн хэмжээний тамирчин бэлтгэхээс гадна үндэсний бөхийн улсын цолтой олон шавь түүнд бий. Мөн Монгол түмний уламжлалт баяр цагаан сарын босгон дээр гавьяат дасгалжуулагч хэмээх эрхэм шагнал хүртсэн Ж.Баярсайханд хүндэтгэл үзүүлсэн юм. Түүний шавь нараас ДАШТ-ий алт, мөнгөн медальт М.Уранцэцэг, ДАШТ-ий мөнгөн медальт Амартүвшин гээд эх орныхоо нэрийг дэлхийн тавцанд өндөрт цуурайтуулсан билээ. Хоёр гавьяат өдгөө энэ онд Индонез улсад болох Азийн наадамд жүдо, самбо бөхийн төрөлд эх орноо төлөөлөн оролцох баг тамирчидаа бэлтгэж байгаа юм. БТСГ-ын дарга спортын салбараас төрийн дээд одон медаль хүртсэн эрхэмүүдийг хүлээн авч хүндэтгэл үзүүлдэг уламжлалын дагуу дээрх хоёр дасгалжуулагчид алд цэнхэр хадаг, мөнгөн аягаар бэлэг барьж, их спортын салбарт үзүүлсэн хөдөлмөр, үр бүтээлд нь баярлаж явдгаа хэлээд цаашдын ажилд нь улам их амжилт хүсэн ерөөсөн юм.