С.Энхболд: Орон нутагт эрүүл мэндийн тусламж үйлчилгээг чанартай, хурдан шуурхай авах боломж бүрдлээ


2 жил

Засгийн газрын гишүүн, Эрүүл мэндийн сайд С.Энхболд болон Эрүүл мэндийн яамны удирдлагууд Орхон аймагт ажиллах хугацаандаа ЭМГ, төрөлжсөн мэргэшлийн эмнэлгийн эмч, ажиллагсадтай уулзалт хийж эрүүл мэндийн салбарт хийгдэж буй шинэчлэлийг танилцуулж, эмч ажилчдын санал бодлыг сонсов.

Мөн Бүсийн оношилгоо эмчилгээний төвийн харьяа “Эрүүл мэндийг дэмжих төв”-ийн нээлтийн үйл ажиллагаанд оролцлоо. Тус төв нь иргэдийн эрүүл мэндийг дэмжих, эрүүл мэндийн боловсрол олгох, хувь хүн, байгууллага хамт олны багц үзлэг оношилгоо, шинжилгээ, тусламж үйлчилгээг цогцоор үзүүлэх юм.

Эрүүл мэндийн дэмжих төвд улсын төсвийн 180 сая төгрөгийн санхүүжилтээр иж бүрэн засвар үйлчилгээг хийж, ясны сийрэгжилтийг оношлох аппарат, шүдний тоног төхөөрөмж, биеийн ерөнхий үзүүлэлтүүдийг тодорхойлох Танита аппарат, нүдний хараа шалгах, оношлох автомат таблиц, чих, хамар, хоолойн иж бүрэн аппарат, дижитал рентген аппарат, зүрхний бичлэгийн аппарат, тархины цахилгаан бичлэгийн аппарат, ходоод, улаан хоолойн уян дурангийн оношилгооны иж бүрэн тоног төхөөрөмж, суурин болон зөөврийн хэт авиан оношилгооны аппарат зэрэг нийт 1.5 тэрбум төгрөгийн өртөг бүхий өндөр үзүүлэлттэй тоног төхөөрөмжөөр хангасан байна.

Эрүүл мэндийг дэмжих төвийн нээлтийн үеэр Эрүүл мэндийн сайд С.Энхболд "2022 оны 05 дугаар сарын 1-нээс улс даяар бүх нийтийг урьдчилан сэргийлэх үзлэгт хамруулах аян эхлэхтэй холбогдуулан Эрүүл мэндийг дэмжих төвүүд байгуулагдаж байна. Мөн улсын төсвийн санхүүжилтээр Бүсийн оношилгоо эмчилгээний төвд өндөр өртөг бүхий ангиографийн болон компьютертомографийн аппаратыг суурилуулснаар гуравдугаар шатлалын эмнэлэгт очих шаардлагагүй, орон нутагт эрүүл мэндийн тусламж үйлчилгээг чанартай, хурдан шуурхай авах боломж бүрдэж байгаа"-г онцолсон юм.

Мөн Эрүүл мэндийн сайд С.Энхболд Бүсийн оношилгоо эмчилгээний төвийн эмч, ажиллагсадтай уулзалт хийж, эрүүл мэндийн салбарын шинэчлэлийн хүрээнд хийж буй ажлуудаа танилцаж тэдний санал бодлыг сонслоо.

Post image
Анхааруулга: Уншигчдын бичсэн сэтгэгдэлд Bestnews.mn хариуцлага хүлээхгүй болно. Зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах хэрэгтэй.
Та мэдээнд саналаа өгсөн байна
1000 Сэтгэгдэлээ бичнэ үү