Баянзүрх дүүрэг, Архангай аймгийн Тариат сумын ЗДТГ-аас уламжлал болгон зохион байгуулдаг “Цагаан идээний үзэсгэлэн худалдаа”-ны нээлт өнөөдөр Бөхийн өргөөний хойд талбайд боллоо. Тус үзэсгэлэнгийн нээлтийн арга хэмжээнд Баянзүрх дүүргийн Эдийн засгийн хөгжлийн асуудал хариуцсан төслийн удирдагч-Засаг даргын орлогч Д.Уламбаяр, дүүргийн Засаг даргын Тамгын газрын дарга Б.Амартүвшин Тариат сумын Засаг дарга Г.Алтан-Очир болон албаны бусад хүмүүс оролцлоо.

Уг үзэсгэлэнд 80 гаруй малчид 1тн цагаан идээ авчирсан бөгөөд ямар нэгэн хольц найрлагагүй цэвэр сүү, сүүн бүтээгдэхүүнээ авчирсан байв. Сарлагийн цагаан идээгээрээ алдартай тус сумын малчид өөрсдийн биеэр ирж ямар нэг хольцгүй цэвэр цагаан идээг энэ сарын 29-ний өдрийг хүртэл борлуулах юм. Мөн Тариат сумын цагаан идээ нь “Архангай түншлэл” үзэсгэлэн худалдаанд аймгийн шилдэгийн шилдэг бүтээгдэхүүнээр хоёр удаа шалгарч байжээ.