“Парис-2017” ДАШТ-ий сонгомол бөхийн төрөл даваа, мягмар гаригт болж өндөрлөллөө. Хоёр дахь өдөр 59, 66, 80, 130 кг-ын жингийн барилдаанболсон юм. “Рио-2016” олимпийн наадмын мөнгө, “Лондон-2012”-ын хүрэл медальт Туркийн Каялп ДАШТ-ээс гурав дахиа түрүүлсэн. Түүний цуглуулгад дэлхийн аваргын хоёр мөнгө, хоёр хүрэл медаль бий. Харин БНСУ-ын Рю Хан Су дэлхийн хошой аварга болсон бол Фүмита, Манукян нар анх удаа түрүүлэв. Олимп, дэлхийн хошой аварга ОХУ-ын шилдэг бөх Роман Власов 80 кг-д хоосон хооцорсон. Тэрбээр эхний даваанд Азербайжаны Элвин Мурсалиевт 2:2-оор ялагдсан юм. Өнөөх нь шигшээд шалгараагүй тул дагах барилдаан гараагүй. Ер нь ОХУ-ын сонгомол бөхийн тамирчид тун тааруухан оролцож, түүхэндээ анх удаа алтан медальгүй буцлаа. Хэдийгээр Оросууд алтгүй буцсан ч хоёр мөнгө, хоёр хүрэл медальтай нийт 46 оноогоор багийн дүнгээр тэргүүлж, Иран 36 (0+0+3), Турк 34 (2+0+1) оноогоор удаллаа.
Өнөөдрөөс эхлэн чөлөөт бөхийн төрөл эхлэх бөгөөд манай ОУХМ П.Орхон, А.Батцэцэг, Э.Даваачимэг, Г.Уртнасан нар барилдана.
ХОЁР ДАХЬ ӨДРИЙН ДҮН
59 кг: 1. Кеничиро Фүмита (Япон) 2. Мирамбек Айнагулов (Казахстан) 3. Степан Марянян (ОХУ), Сон Гак Ким (БНСУ)
66 кг: 1. Рю Хан Су (БНСУ) 2. Матеуш Бернатек (Польш) 3. Артем Сурков (ОХУ), Атакан Юксель (Турк)
80 кг: 1. Максим Манукян (Армен) 2. Радик Кулиев (Беларусь) 3. Паскаль Эйзель (Герман), Элвин Мурсалиев (Азербайжан)
130 кг: 1. Риза Каялп (Турк) 2. Хейке Наби (Эстони) 3. Оскар Пино Хиндс (Куба), Ясмани Акоста (Чили)
0
0
0
0
0
0
