УИХ-ын гишүүн Д.Гантулга, Д.Мурат нарын бүрэн эрхийг түдгэлзүүлэх прокурорын саналд УИХ өнөөдрийн дотор хариу өгөх ёстой. Уг асуудлаар МАН-ын бүлэг хуралдсан бол АН-ын бүлэг хуралдах шаардлагагүй гэж үзээд байгаа юм. Тус намын бүлгүүд гишүүд хамгаалах, эсвэл бүрэн эрхийг нь түдгэлзүүлэхийг дэмжих нь зүйтэй гэсэн нэгдсэн шийдэлд хүрсэнгүй. Дэд хороо, Байнгын хороо, чуулганы нэгдсэн хуралдаанаар хэлэлцэх үед гишүүд өөр өөрсдийнхөө итгэл үнэмшлээр асуудалд хандах нь зүйтэй гэж үзээд байна. Улмаар 48 цагийн дотор багтааж асуудлыг шийдэх үүднээс УИХ-ын дарга Дэд хороо, Байнгын хороо, чуулганы нэгдсэн хуралдааныг яаралтай хуралдуулах чиглэл  өгчээ. Чуулганы нэгдсэн хуралдааныг 15.00 цагт эхлүүлэхээр төлөвлөж түүнээс өмнө Халдашгүй байдлын дэд хороо, Хууль зүй, Төрийн байгуулалтын байнгын хороог хуралдуулахаар боллоо. Одоогийн байдлаар Халдашгүй байдлын дэд хорооны хуралдаан эхэлсэн бөгөөд Д.Ганутлга, Д.Мурат нарыг Дэд хорооны хуралд биечлэн оролцуулахаар дууджээ. Энэ бүх хуралдаан нь хаалттай горимоор явагдана гэдгийг эх сурвалж хэллээ.