79 сургуулийн хөлбөмбөгийн талбайд тоглож байсан тус сургуулийн сурагч хүү амиа алдсан харамсалтай хэрэг гарсан. Үүнтэй холбогдуулан 79 дүгээр саргуулийн захирал Ш.Болор-Эрдэнэ хэвлэлд ярилцлага өгөхдөө "Ар гэрийн хүмүүстэй нь холбоо бариагүй. Ангийнх нь багш нь түүнийг сайн мэдэх байх. Миний санахаар эрсдэлт бүлгийн хүү байсан. Ээж нь салаад явчихсан, аав нь архины хамааралтай эмээтэйгээ амьдардаг ар гэрийн хараа хяналт султай хүүхэд байсан. Эндхийн хүүхдүүд хэлэхдээ энэ хавьд байнга тоглодог хүүхэд байсан гэх юм билээ" хэмээн ярьсан нь олон нийтийн дургүйцлийг хүргэсэн. Засгийн газрын өчигдрийн хуралдаанаар энэ тухай хэлэлцээд "Сургуулийн орчны аюулгүй байдлыг хангаагүй, хүүхдийг ялгаварласан ёс зүйгүй мэдэгдэл хийсэн" гэдэг үндэслэлээр 79-р сургуулийн захирал Ш.Болор-Эрдэнэд хуулийн арга хэмжээ авахаар болоод байсан юм. Үүний дагуу түүнийг өчигдөр үүрэгт ажлаас нь чөлөөлжээ.